Tags

【見工一分鐘】

March 10, 2017

見工同考試一樣,都係人生中無可避免。考試有攻略,見工又有冇?唔好只係道聽途說,入嚟睇下!見工原來都可以好簡單。

 

#生涯規劃 #HR #見工 #CV #Coverletter
#參加課外活動為咗搵工真係好Sad
#信自己 #試下又唔會死

 

 

【廢青求職攻略】跟人力資源專家意見,搵工一定掂?

 

早排01熱話登咗篇文,係哈佛學生Jessica Pointing教大家寫神級CV。雖然我都唔覺得佢份CV有幾神級,不過我幾認同佢啲point,諗住share去我Facebook page之際,點知見到篇文下半部份,訪問咗個人力資源顧問,提醒我要寫今篇呢個想寫好耐嘅題目!

 

有時睇到啲顧問教大學生要點樣準備畢業後條路、要點樣打造一份令人過目不忘印象深刻嘅CV,真係覺得好好笑。而家咩年代?顧問們究竟知唔知「網絡」改變咗幾多行業?仲用廿年前嗰套方法嚟吸引僱主?唔係唔得,最後咪吸引到「仍然好buy廿年前嗰套」嘅僱主囉,如果你想跟呢班僱主工作,顧問嗰啲方法不妨一試。

 

我呢篇文唔係針對回應Jessica Pointing嗰一位顧問,因為佢講嘅嘢,亦係大家由高中開始去求職講座所聽到嘅嘢,即係大部份人力資源專家們都相信的道理,所以我係想一次過講出對呢啲耳熟能詳道理的看法,並唔係特別反對一位人士意見。

 

 參加課外活動幫到你搵工?

首先,專家們總係話你做學生嗰陣就要諗定將來條路,喂,真係諗到?我想問返佢係唔係讀緊大學就希望畢業後負責教人/幫人搵工?有幾多人真係做緊/做過細個「我的志願」所寫嘅工作?(利申:我係,不過我身邊好多人都唔係)除咗專業人士,乜師物師真係要好早決定去向,因為要讀好多年書。否則,路,好多時都係一步步行出嚟,越行越知自己想點。

 

成日同啲學生講要諗定第時返咩工而決定你今日參加乜課外活動,因為你參加嘅課外活動可以將來喺見工時候講。好啦,各位已經喺社會工作緊嘅讀者,大家心裡明白,公開試成績都唔係成日有僱主睇啦,何況課外活動?你拎過話劇團最佳女主角又如何呀?

 

坦白啲啦,參加課外活動對求職嘅用處嚟講,最重要係識多啲師兄師姐,同佢地熟啲,畀更多人見到你嘅性格同才能,希望畢業之後佢地會介紹工比你,識人好過識字呀,特別係fresh grad。當然,選活動個前題係,你真係鐘意、投入,先會識到真朋友,咁人地先會幫你。再者,當大學生參加課外活動只係為份工而唔係為興趣,香港真係好悲哀。

 

 

 Cover letter真係重要?

Cover letter重唔重要真係可圈可點,但我覺得隨住互聯網發達到連幼稚園學生都上網做功課嘅年代,僱主真係唔知封信係喺網上集百家大全?當中分別就係懶嘅求職者,搵一篇參考;勤力嘅求職者,搵十篇參考。想睇你學業、職場經驗,睇resume就得,想認識你個人,直接叫你上嚟講啦,cover letter係要寫,不過簡單一兩段就夠了。

 

 神級CV 點寫好?

至於點樣先係一份好CV?邊有得一概而論,要睇你申請嗰份係咩工作、咩行業,我有朋友本身做開創作,申請份工就係marketing – account manager,請人返去度橋湊客,呢啲工就應該喺CV顯示你的創意,而非用傳統方式申請,所以佢張CV就只得大半頁A4,直接將自己做過嘅project寫出嚟,加幾幅圖,再寫埋自己期望薪酬同可到職日期,搞掂。

 

我做過傳媒,份工需要人寫嘢之外,仲要識用排版軟件,結果我份CV就排版排咗個雜誌封面出嚟,封面內容係一D簡單嘅自我介紹,然後就send得。

 

而家一街都係youtuber,假設youtuber想申請一份拍片剪片工作,咁佢send自己其中一條片比僱主就解釋哂一切技能啦,仲寫乜鬼resume吖。要成功得到一份工,最緊要係仔細閱讀個招聘廣告,諗吓人地想要一個咩人,如果諗完真係覺得適合自己,就將自己合適的特質放大,用適當形式呈現出嚟。

 

 

原文出處:HK01

原文連結:https://www.hk01.com/sns/article/76185

Please reload

香港生涯規劃協會 Hong Kong Life Planning Association

​電話 : (852) 3169 9208

​傳真 : (852) 2558 3884

地址 : 香港觀塘偉業街118號 Tuspark 603室 (牛頭角B6 出口)
         Rm 603, Tuspark, 118 Wai Yip Street, Kwun Tong, Hong Kong

©2019 by LPAHK